ສຳນັກຂ່າວຕ່າງປະເທດ ລາຍງານໃນວັນທີ 21 ກໍລະກົດຜ່ານມານີ້ວ່າ ເຈົ້າໜ້າທີ່ຕຳຫລວດຫວຽດນາມ ໄດ້ຈັບກຸມ ທ່ານ ຫງວຽນຊວນເຊິນ (Nguyen Xuan Son) ອະດີດປະທານຄະນະກຳມະການບໍລິຫານ ລັດວິສາຫະກິດ PetroVietnam ໃນຂໍ້ຫາໃຊ້ອຳນາດໜ້າທີ່ບໍ່ຖືກຕ້ອງ ແລະ ບໍ່ປະຕິບັດຕາມກົດລະບຽບຂອງລັດ ໃນການບໍລິຫານທຸລະກິດ ໂດຍເຈົ້າໜ້າທີ່ກົມໃຫຍ່ຕຳຫລວດ ໄດ້ເຂົ້າກວດຄົ້ນເຮືອນພັກຂອງຜູ້ກ່ຽວ ທີ່ນະຄອນຫລວງຮ່າໂນ້ຍ ໃນມື້ວານນີ້ (21 ກໍລະກົດ) ໃນຂະນະທີ່ຜູ້ກ່ຽວເອງ ຍັງຄົງນອນປິ່ນປົວຢູ່ໂຮງໝໍແຫ່ງໜຶ່ງ.

ກ່ອນໜ້ານີ້ ໃນມື້ວັນອາທິດທີ 19 ກໍລະກົດຜ່ານມາ ທ່ານນາຍົກລັດຖະມົນຕີ ຫງວຽນເຕິນຢຸງ ຂອງຫວຽດນາມ ໄດ້ມີຄຳສັ່ງຍົກຍ້າຍ ທ່ານ ຫງວຽນຊວນເຊິນ ອອກຈາກຕຳແໜ່ງປະທານລັດວິສາຫະກິດເປໂຕຣຫວຽດນາມແລ້ວ ໂດຍຍ້າຍໄປດຳລົງຕຳແໜ່ງເປັນຫົວໜ້າກົມພະລັງງານທົ່ວໄປ ທີ່ກະຊວງອຸດສາຫະກຳ ແລະ ການຄ້າແທນ ເຊິ່ງພາຍຫລັງການຍົກຍ້າຍແບບສາຍຟ້າແມບດັ່ງກ່າວພຽງບໍ່ພໍເທົ່າໃດມື້ ທ່ານຫງວຽນຊວນເຊິນ ກໍໄດ້ຖືກສັ່ງຟ້ອງສານເພື່ອດຳເນີນຄະດີ ອັນນຳມາເຊິ່ງການຈັບກຸມໂຕດັ່ງກ່າວ.

ທັງນີ້ ເປໂຕຣຫວຽດນາມ ແມ່ນຊື່ທາງການຄ້າ ແລະ ເປັນກາໝາຍການຄ້າຂອງກຸ່ມລັດວິສາຫະກິດນ້ຳມັນ ແລະ ອາຍແກັສແຫ່ງຊາດ ຫລື PVN (Vietnam Oil and Gas Group) ເຊິ່ງເປັນລັດວິສາຫະກິດທີ່ມີຊັບສິນມະຫາສານ ແລະ ມີບໍລິສັດລູກຫລາຍສິບບໍລິສັດ ທັງຢູ່ພາຍໃນ ແລະ ຕ່າງປະເທດ ໂດຍໃນນັ້ນແມ່ນລວມທັງມີບໍລິສັດລູກ ທີ່ດຳເນີນທຸລະກິດປ້ຳນ້ຳມັນເຊື້ອໄຟ PV Oil ຢູ່ ສປປ ລາວ ອີກດ້ວຍ.

ແຫຼ່ງ​ຂ່າວ: