ພິທີລົງນາມສັນຍາວ່າດ້ວຍການພັດທະນາເຂດນິຄົມອຸດສາຫະກຳ ປາກເຊ-ຍີ່ປຸ່ນ ເອັສເອັມອີ ແຂວງຈຳປາສັກ ເພື່ອສ້າງຕັ້ງເປັນເຂດເສດຖະກິດສະເພາະຂຶ້ນກັບເຂດເສດຖະກິດພິເສດ ແຂວງຈຳປາສັກ ລະຫວ່າງທ່ານ ດຣ. ບຸນຖອງ ດີວິໄຊ ເຈົ້າແຂວງຈຳປາສັກ ທັງເປັນກຳມະການແຫ່ງຊາດລາວ ເພື່ອຄຸ້ມຄອງເຂດເສດຖະກິດພິເສດ ແລະ ເຂດເສດຖະກິດສະເພາະ (ຄຂພສ) ແລະ ທ່ານ ວັນນະດາ ພົມມະສະຖິດ ປະທານບໍລິສັດ ສະຫວັນທີວີເອັສ ຄອນເຊົາຕັນ ຈຳກັດ ໄດ້ມີຂຶ້ນໃນຕອນແລງວັນທີ 5 ສິງຫານີ້ທີ່ໂຮງແຮມລາວພລາຊາ,ນະຄອນຫລວງວຽງຈັນ,ໂດຍການເຂົ້າຮ່ວມຂອງທ່ານ ສອນໄຊ ສີພັນດອນ ລັດຖະມົນຕີ, ຫົວໜ້າຫ້ອງວ່າການລັດຖະບານ, ທ່ານນາງ ບຸນເພັງ ມູນໂພໄຊ ລັດຖະມົນຕີປະຈຳຫ້ອງວ່າການລັດຖະບານ,ຮອງປະທານຜູ້ປະຈຳການ ຄຂພສ, ທ່ານເອກອັກຄະລັດຖະທູດຍີ່ປຸ່ນ, ອົງການ JICA ປະຈຳລາວ, ອົງການການຄ້າລະຫວ່າງປະເທດແຫ່ງປະເທດຍີ່ປຸ່ນ (JETRO) ເຂົ້າຮ່ວມນຳດ້ວຍ.

ເຂດນິຄົມອຸດສາຫະກຳດັ່ງກ່າວຈະມີມູນຄ່າລົງທຶນປະມານ 62 ລ້ານໂດລາສະຫະລັດ, ມີເນື້ອທີ່ສຳປະທານ 195 ເຮັກຕາ ໃນໄລຍະເວລາ 50 ປີ ເພື່ອອຳນວຍຄວາມສະດວກ ແລະ ເປັນຖານຮອງຮັບໃຫ້ແກ່ການດຶງດູດເອົາຜູ້ລົງທຶນຈາກຕ່າງປະເທດ ໂດຍສະເພາະແມ່ນບໍລິສັດ ແລະ ວິສາຫະກິດຕ່າງໆຈາກປະເທດຍີ່ປຸ່ນເຂົ້າມາດຳເນີນການຜະລິດ, ທຸລະກິດ ແລະ ການບໍລິການຕ່າງໆ ເພື່ອຜະລິດສິນຄ້າສົ່ງອອກ ແນໃສ່ສົ່ງເສີມ ແລະ ສ້າງວຽກເຮັດງານທຳທີ່ໝັ້ນຄົງໃຫ້ປະຊາຊົນໃນທ້ອງຖິ່ນໄປຄຽງຄູ່ກັບການຮັບປະກັນໃນການປົກປັກຮັກສາສິ່ງແວດລ້ອມ.

ນອກຈາກນີ້ ຍັງເປັນການຍົກລະດັບເອົາເຂດຫ່າງໄກສອກຫລີກມາເປັນເຂດຈຸດສຸມພັດທະນາອີກແຫ່ງໜຶ່ງ ພາຍໃຕ້ນະໂຍບາຍ, ກົນໄກການຄຸ້ມຄອງ ແລະ ບໍລິຫານ ຂພສ ທີ່ເປັນວຽກງານບຸກທະລຸໃນໄລຍະໃໝ່ ເຊິ່ງໄດ້ກຳນົດໄວ້ໃນນິຕິກຳວ່າດ້ວຍການພັດທະນາ ແລະ ຄຸ້ມຄອງ ຂພສ ໄປຈັດຕັ້ງຜັນຂະຫຍາຍ ໂດຍຜ່ານການຄຸ້ມຄອງບໍລິຫານຕາມກົນໄກກາປະທັບດຽວ, ຫັນເປັນອຸດສາຫະກຳ ແລະ ທັນສະໄໝ ດ້ວຍການນຳໃຊ້ລະບົບເອເລັກໂຕຣນິກເຂົ້າໃນການຄຸ້ມຄອງບໍລິຫານທີ່ຮັບປະກັນຄວາມປອດໃສ ແລະ ສາມາດກວດສອບໄດ້ ເພື່ອຊຸກຍູ້ ແລະ ອຳນວຍຄວາມສະດວກໃຫ້ແກ່ການດຳເນີນທຸລະກິດ, ການບໍລິການເພື່ອປະກອບສ່ວນໃຫ້ແກ່ການພັດທະນາເສດຖະກິດ-ສັງຄົມຂອງທ້ອງຖິ່ນ ແລະ ຂອງຊາດຂະຫຍາຍໂຕເປັນລຳດັບ.

ພາບແລະຂ່າວ: ລາວພັດທະນາ

http://www.tholakhong.com