ລາຍງານຈາກຂ່າວສານປະເທດລາວ: ພິທີມອບ-ຮັບໜ້າທີ່ເລຂາພັກແຂວງ, ເຈົ້າແຂວງສາລະວັນ ລະຫວ່າງ ທ່ານ ຄໍາບຸ່ນ ດ້ວງປັນຍາ ກຳມະການສູນກາງພັກ, ເລຂາພັກແຂວງ, ເຈົ້າແຂວງສາລະວັນຜູ້ເກົ່າ ແລະ ທ່ານ ສີສຸວັນ ວົງຈອມສີ ເລຂາພັກແຂວງ, ເຈົ້າແຂວງສາລະວັນຜູ້ໃໝ່ ໄດ້ຈັດຂຶ້ນຢ່າງເປັນທາງການ ໃນຕອນເຊົ້າ ຂອງວັນທີ 10 ສິງຫາ2015 ຢູ່ທີ່ສະໂມສອນ ຫ້ອງວ່າການປົກຄອງແຂວງສາລະວັນ ໂດຍໃຫ້ກຽດເຂົ້າຮ່ວມເປັນສັກຂີພິຍານຂອງ ທ່ານ ດຣ. ບຸນປອນ ບຸດຕະນະວົງ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ ຜູ້ຊີ້ນໍາວຽກງານເສດຖະກິດມະຫາພາກ ແລະ ບໍລິການ; ມີບັນດາຄະນະປະຈໍາພັກແຂວງ, ກໍາມະການພັກແຂວງ, ພະນັກງານຫຼັກແຫຼ່ງ ແລະ ພະນັກງານອາວຸໂສບຳນານ ກໍ່ໄດ້ເຂົ້າຮ່ວມ.

ໂອກາດນີ້, ທ່ານ ນາງ ວິໄລວັນ ເພັງສະຫວັດ ຕາງໜ້າຄະນະຈັດຕັ້ງສູນກາງໄດ້ຂຶ້ນຜ່ານລັດຖະດໍາລັດ ຂອງປະທານປະເທດແຫ່ງ ສປປ ລາວ ສະບັບເລກທີ 053/ປປທ, ລົງວັນທີ 29 ເມສາ2015 ວ່າດ້ວຍການອະນຸມັດໃຫ້ ທ່ານ ຄໍາບຸ່ນ ດວງປັນຍາ ອອກພັກການຮັບເບ້ຍບໍານານ ແລະ ລັດຖະດຳລັດຂອງປະທານປະເທດ ແຫ່ງ ສປປ ລາວ ສະບັບເລກທີ 108/ປປທ ລົງວັນທີ 31ກໍລະກົດ2015 ວ່າດ້ວຍການແຕ່ງຕັ້ງທ່ານ ສີສຸວັນ ວົງຈອມສີເປັນເຈົ້າແຂວງໆສາລະວັນ.

ໃນໂອກາດດຽວກັນນີ້, ທ່ານ ຄໍາບຸ່ນ ດ້ວງປັນຍາ ກໍາມະການສູນກາງພັກ, ເລຂາພັກແຂວງ ເຈົ້າແຂວງໆສາລະວັນຜູ້ເກົ່າ ກໍ່ໄດ້ລາຍງານ: ຕະຫຼອດໄລຍະ 12ປີກວ່າທີ່ຜ່ານມາ ໄດ້ຄຽງບ່າຄຽງໄຫຼ່ກັບ ບັນດາຄະນະນຳຂອງແຂວງ, ເມືອງ ແລະອຳນາດການປົກຄອງທຸກຂັ້ນ ເຊິ່ງເຮັດໃຫ້ຄວາມສາມັກຄີພາຍໃນການນຳ, ພາຍໃນພັກ, ພະນັກງານ ແລະ ປະຊາຊົນທົ່ວແຂວງ ໄດ້ຮັບການຍົກສູງ ຂຶ້ນເປັນກ້າວໆນັ້ນໄດ້ກາຍເປັນສ່ວນປະກອບອັນສໍາຄັນ ເຂົ້າໃນການປົກປັກຮັກສາ ແລະພັດທະນາເສດຖະກິດ-ສັງຄົມຂອງແຂວງ ກ້າວຂຶ້ນຢ່າງໜັກແໜ້ນ, ເຮັດໃຫ້ລວມຍອດຜະລິດຕະພັນພາຍໃນ ສະເລ່ຍໃນລະດັບ 11,48ສ່ວນຮ້ອຍຕໍ່ປີ. ສະເລ່ຍຕໍ່ຫົວຄົນ ບັນລຸໄດ້ 9.000.000 ກວ່າກີບ ຫຼື ເທົ່າກັບ 1.170ໂດລາຕໍ່ຄົນຕໍ່ປີ.

ຈາກນັ້ນ, ທ່ານເລຂາພັກແຂວງ, ເຈົ້າແຂວງໆສາລະວັນຜູ້ໃໝ່ກໍ່ໄດ້ກ່າວຮັບໜ້າທີ່ຕຳແໜ່ງ ເຊິ່ງທ່ານໄດ້ກ່າວວ່າ:ເພື່ອສືບຕໍ່ເຮັດສຳເລັດໜ້າທີ່ ທີ່ໄດ້ຮັບມອບໝາຍນີ້, ຂ້າພະເຈົ້າ ພ້ອມດ້ວຍພະນັກງານຫຼັກແຫຼ່ງພາຍໃນແຂວງ ຈະສຸມທຸກສະຕິປັນຍາ-ເຫື່ອແຮງຈົນສຸດຄວາມສາມາດຂອງຕົນ ເພື່ອປະກອບສ່ວນເຂົ້າໃນໜ້າທີ່ວຽກງານພ້ອມທີ່ຈະຄຽງບ່າຄຽງໄຫຼ່ ກັບໝູ່ຄະນະ, ສືບຕໍ່ເຕົ້າໂຮມຄວາມສາມັກຄີພາຍໃນພັກ, ພະນັກງານ ກຳລັງປະກອບອາວຸດ ແລະ ປະຊາຊົນບັນດາເຜົ່າ, ໃຫ້ມີຄວາມໜັກແໜ້ນເຂັ້ມແຂງ, ສູ້ຊົນຈັດຕັ້ງປະຕິບັດ ບັນດາຄາດໝາຍຕ່າງໆ ທີ່ພັກແລະ ລັດລັດຖະ ບານ ໄດ້ວາງອອກ ເວົ້າລວມ, ເວົ້າສະເພາະ ກໍ່ແມ່ນບັນດາຄາດໝາຍທີ່ໄດ້ກໍານົດໄວ້ ຢູ່ໃນມະຕິຂອງອົງຄະນະພັກແຂວງໃຫ້ບັນລຸຕາມຄາດໝາຍທີ່ວາງໄວ້.

ໂອກາດດັ່ງກ່າວ ທ່ານ ດຣ. ບຸນປອນ ບຸດຕະນະວົງ ກໍ່ໄດ້ໃຫ້ກຽດໂອ້ລົມພ້ອມທັງໃຫ້ທິດຊີ້ນຳ ໃນການປະຕິບັດວຽກງານໃນແຕ່ລະດ້ານ ເພື່ອເຮັດໃຫ້ການພັດທະນາເສດຖະກິດ-ສັງຄົມ ຢູ່ແຂວງສາລະວັນ ສືບຕໍ່ຂະຫຍາຍຕົວຢ່າງບໍ່ຢຸດຢັ້ງນັ້ນ ແຂວງຈະຕ້ອງໄດ້ສືບຕໍ່ເອົາໃຈໃສ່ ເປັນຕົ້ນ ຕ້ອງເພີ່ມທະວີຄວາມສາມັກຄີພາຍໃນພັກ, ກໍາລັງປະກອບອາວຸດ ແລະ ປະຊາຊົນບັນດາເຜົ່າ ໃຫ້ມີຄວາມໜັກ ແໜ້ນເຂັ້ມແຂງ, ຕັ້ງໜ້າຜັນຂະຫຍາຍແນວທາງປ້ອງກັນຊາດ-ປ້ອງກັນຄວາມສະຫງົບ ທົ່ວປວງຊົນຮອບດ້ານ; ເອົາໃຈໃສ່ວຽກງານພັດທະນາຊົນນະບົດຮອບດ້ານ ຕິດພັນກັບການແກ້ໄຂຄວາມທຸກຍາກຂອງປະຊາຊົນ, ສືບຕໍ່ປັບປຸງ ແລະ ຂະຫຍາຍການສຶກສາ, ສາທາລະນະສຸກ ແລະ ວຽກງານວັດທະນະທໍາສັງຄົມ ແນໃສ່ ສ້າງຄົນໃຫ້ມີຄວາມຮູ້, ຄວາມສາມາດ, ມີຄຸນສົມບັດສິນທໍາປະຕິວັດ, ມີສຸຂະພາບທີ່ແຂງແຮງ ກາຍເປັນກໍາລັງແຮງສໍາຄັນຂອງການພັດທະນາ. ຕ້ອງຊຸກຍູ້ສົ່ງເສີມການຜະລິດເປັນສິນຄ້າຂອງປະຊາຊົນ ຕິດພັນກັບການປຸງແຕ່ງຢ່າງມີຈຸດສຸມ ໂດຍການໝູນໃຊ້ທ່າແຮງຂອງແຕ່ລະທ້ອງຖິ່ນ. ສໍາຄັນ ຕ້ອງເອົາໃຈໃສ່ດຶງດູດ ແລະ ສ້າງເງື່ອນໄຂໃນການລົງທຶນໃຫ້ສູງຂຶ້ນ ທັງພາຍໃນ ແລະ ຕ່າງປະເທດ ໃຫ້ສອດຄ່ອງກັບແຜນພັດທະນາເສດຖະກິດ-ສັງຄົມຂອງແຂວງ ແລະ ການພັດທະນາທີ່ຍືນຍົງ.

http://www.tholakhong.com