ສຳນັກຂ່າວຕ່າງປະເທດ ລາຍງານໃນວັນທີ 8 ກໍລະກົດນີ້ ໂດຍລະບຸວ່າ ນະຄອນຫລວງບາງກອກ ຫລື ກຸງເທບມະຫານະຄອນຂອງໄທ ເຊິ່ງມີປະຊາກອນອາໄສຢູ່ເກືອບ 10 ລ້ານຄົນ ອັນເປັນພື້ນທີ່ເຊິ່ງດິນເປັນລັກສະນະຜຸຜຸ່ຍ ແລະ ຊຸ່ມນ້ຳ ແຕ່ມີການກໍ່ສ້າງຕຶກອາຄານໂຄງສ້າງເຫລັກ ແລະ ຄອນກຣີດຢ່າງມະຫາສານ ເຮັດໃຫ້ປຽບທຽບຄ້າຍຄືກັບສ້າງຕຶກຢູ່ເທິງກ້ອນເຄັກ ໂດຍຜູ້ຊ່ຽວຊານໄດ້ເຕືອນວ່າ ບາງກອກກຳລັງຈະຈົມຫາຍລົງຢູ່ໃຕ້ນ້ຳ ຄືກັບຊະຕາກຳຂອງເກາະແອັດແລນຕິກ ທີ່ຈົມລົງຢູ່ໃຕ້ມະຫາສະໝຸດແອັດແລນຕິກ ຕັ້ງແຕ່ສະໄໝດຶກດຳບັນ.

ເວັບໄຊ towleroad.com ໄດ້ລະບຸວ່າ ຜູ້ຊ່ຽວຊານດ້ານໄພພິບັດທາງທຳມະຊາດຫລາຍຄົນໃນໄທບອກວ່າ ບາງກອກຈະຈົມລົງຕ່ຳກ່ວາລະດັບນ້ຳທະເລເຖິງ 5 ຟຸດ (ປະມານ 1,52 ແມັດ) ພາຍໃນປີ 2030 ຫລື ອີກ 15​ ປີຂ້າງໜ້າ ແລະ ຍັງໄດ້ລະບຸອີກວ່າ ກ່ອນໜ້ານີ້ມີການຄາດໝາຍວ່າ ນະຄອນຫລວງບາງກອກ ກຳລັງຈົມນ້ຳຫລາຍຂຶ້ນທຸກໆປີ ປີລະກ່ວາ 3 ນິ້ວ (7.62 ຊັງຕີແມັດ) ແຕ່ສຳລັບຂໍ້ມູນໃໝ່ນີ້ພົບວ່າ ມັນຈະຈົມລົງໄວຂຶ້ນໃນລະດັບ 4 ນິ້ວ (10.16 ຊັງຕີແມັດ) ເຊິ່ງສາມາດທຳນາຍອານາຄົດຂອງບາງກອກໄດ້ວ່າ ໃນອີກ 85 ປີຂ້າງໜ້ານີ້ ຫລື ພາຍໃນປີ ຄ.ສ 2100 ເມືອງທັງເມືອງຈະຈົມລົງຢູ່ໃຕ້ນ້ຳທະເລທັງໝົດ ແລະ ຈະບໍ່ສາມາດອາໄສຢູ່ໄດ້ອີກຕໍ່ໄປ.

ແຫລ່ງຂ່າວຍັງໄດ້ລະບຸອີກວ່າ ຈາກສະພາວະໂລກຮ້ອນຄືດັ່ງໃນປັດຈຸບັນນີ້ ແມ່ນຍິ່ງຈະເຮັດໃຫ້ກາຍເປັນປັດໄຈເພີ່ມລະດັບນ້ຳທະເລສູງຂຶ້ນ ແລະ ບາງກອກກໍຈະຈົມຢູ່ໃຕ້ນ້ຳທະເລໃນລະດັບທີ່ຮຸນແຮງຂຶ້ນ.

ແນວໃດກໍຕາມ ຜູ້ຊ່ຽວຊານໄດ້ໃຫ້ການແນະນຳທາງອອກຢູ່ 2​ ທາງເລືອກຄື ທາງເລືອກທີໜຶ່ງ ແມ່ນກໍ່ສ້າງກຳແພງກັ້ນນ້ຳໂດຍກົງ ເຊິ່ງຈະໃຊ້ງົບປະມານສູງເຖິງ 3 ຕື້ໂດລາ ຫລື ຄິດເປັນເຄິ່ງໜຶ່ງຂອງຈີດີພີຂອງປະເທດ, ສ່ວນທາງເລືອກທີສອງ ແມ່ນການອົບພະຍົບປະຊາຊົນ ຂຶ້ນໄປອາໄສຢູ່ບ່ອນທີ່ສູງກ່ວານີ້.

ແຫຼ່ງ​ຂ່າວ:http://www.laopost.com/