ຊົມເຊີຍ ພະນັກງານ ວຽງຈັນເຊັນເຕີ ທີ່ຊ່ວຍກັນລະດົມການຊ່ວຍເຫຼືອ ຊ່ວຍຜູ້ໄດ້ຮັບຜົນກະທົບ ຈາກໄພນ້ຳຖ້ວມ (08-08-2015)


      

    ສູນການຄ້າວຽງຈັນເຊັນເຕີ ລະດົມທຶນຊ່ວຍເຫຼືອຜູ້ໄດ້ຮັບຜົນກະທົບຈາກໄພນໍ້າຖ້ວມ
    ຕອນເຊົ້າວັນທີ 7 ສິງຫານີ້, ທີ່ສູນການຄ້າວຽງຈັນເຊັນເຕີ ທ່ານ Liu hu ຜູ້ອໍານວຍການສູນການຄ້າວຽງຈັນເຊັນເຕີ ແລະ ທ່ານ Li xiao dong ຮອງຜູ້ອໍານວຍການສູນການຄ້າວຽງຈັນເຊັນເຕີ ພ້ອມດ້ວຍພະນັກງານ ເກືອບ 150 ຄົນ ຮ່ວມໃຈກັນສົມທົບທຶນ ເພື່ອຊ່ວຍເຫຼືອຜູ້ໄດ້ຮັບຜົນກະທົບຈາກໄພນໍ້າຖ້ວມ. 
    ສໍາລັບເງິນທີ່ໄດ້ຈາກການສົມທົບທຶນຄັ້ງນີ້, ເປັນເງິນ 10,122,500 ກີບ. ເພື່ອນໍາໄປຊື້ເຂົ້າສານ, ອາຫານແຫ້ງ, ຢາປົວພະຍາດ, ນໍ້າດື່ມ ແລະ ເຄື່ອງໃຊ້ທີ່ຈຳເປັນອື່ນໆ ເພື່ອນໍາໄປມອບໃຫ້ຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມ, ແຂວງບໍ່ແກ້ວ, ແຂວງຫຼວງນໍ້າທາ, ແຂວງບໍລິຄໍາໄຊ ແລະ ບ່ອນອື່ນໆ. 
    ໃນວັນທີ 6 ສິງຫາ ນີ້, ໜັງສືພິມປະຊາຊົນເສດຖະກິດ-ສັງຄົມ ຂອງລາວ ໃຫ້ຮູ້ວ່າ: ປີນີ້ ເຫັນວ່າໄພພິບັດທາງທຳມະຊາດໄດ້ມາຄຸກຄາມໄວກວ່າທຸກໆປີເຮັດໃຫ້ຫຼາຍແຂວງໄດ້ຮັບຜົນກະທົບຢ່າງໜັກເປັນຕົ້ນແມ່ນພຶ້ນທີ່ທຳການຜະລິດກະສິກຳຕ່າງໆເສຍຫາຍຈຳນວນຫຼາຍ, ປະຊາຊົນຂາດແຄນອາຫານການກິນ ໂດຍສະເພາະເຂົ້າ, ນ້ຳດື່ມ, ເຄື່ອງນຸ່ງຫົ່ມ ແລະ ຢາປົວພະຍາດ ໃນນັ້ນ ປະກອບມີແຂວງ ຄຳມ່ວນ, ໄຊສົມບູນ, ຫຼວງນ້ຳທາ ແລະ ແຂວງ ບໍ່ແກ້ວ ສຳລັບ 4 ແຂວງ ພາກໃຕ້ຄື: ສາລະວັນ, ເຊກອງ, ອັດຕະປື ແລະ ແຂວງ ຈຳປາສັກ ແມ່ນຍັງບໍ່ທັນມີລາຍງານ. ພາຍຫລັງຝົນຕົກເປັນເວລາຫລາຍວັນສົ່ງຜົນເຮັດໃຫ້ນໍ້າຂອງ ແລະ ສາຂາເພີ່ມປະລິມານຂຶ້ນກະທັນຫັນ ແລະ ໄຫລເຂົ້າຖ້ວມ 3 ເມືອງ: ບໍລິຄັນ, ປາກກະດິງ ແລະ ທ່າພະບາດເຮັດໃຫ້ບ້ານເຮືອນຈຳນວນໜຶ່ງ ແລະ ເນື້ອທີ່ປູກເຂົ້ານາປີປະມານ 20 ພັນກວ່າເຮັກຕາຈົມໃຕ້ນໍ້າ, ໃນນັ້ນມີພຽງເມືອງບໍລິຄັນເທົ່ານັ້ນທີ່ຖືກນໍ້າຖ້ວມຮຸນແຮງທີ່ສຸດໂດຍສະເພາະຢູ່ບ້ານປາກເຫືອງຖືກນໍ້າຖ້ວມທັງໝົດ 73 ຫລັງຄາເຮືອນ ສົ່ງຜົນເຮັດໃຫ້ປະຊາຊົນຕ້ອງຍົກຍ້າຍໜີຈາກເຫດນໍ້າຖ້ວມສຸກເສີນ. ປັດຈຸບັນນີ້ ເຈົ້າໜ້າທີ່ສະເພາະກິດລົງພື້ນທີ່ກວດກາຕິດຕາມສະພາບການທີ່ເກີດຂຶ້ນໄປຄວບຄູ່ກັບການຊ່ວຍປະຊາຊົນເບື້ອງຕົ້ນໂດຍສະເພາະໄດ້ແຈກຈ່າຍເຂົ້າສານອາຫານແຫ້ງ, ຢາປິ່ນປົວພະຍາດ ເພື່ອປ້ອງກັນບໍ່ໃຫ້ເກີດພະຍາດລະບາດ.
    ຂະນະດຽວກັນ ທາງວິທະຍຸແຫ່ງຊາດລາວ ກໍໄດ້ລາຍງານສະພາບນ້ຳຖ້ວມບາງແຂວງວ່າ: ເຂດພາກເໜືອທີ່ປະສົບນ້ຳຖ້ວມມີ ແຂວງ ຫຼວງນ້ຳທາ ມີທັງໝົດ 5 ເມືອງ ຄື: ເມືອງ ລອງ, ນາແລ, ວຽງພູຄາ ແລະ ເມືອງ ສິງ ລວມທັງໝົດ 20 ບ້ານທີ່ຖືກນ້ຳຖ້ວມ, ສ່ວນແຂວງ ບໍ່ແກ້ວ ໄດ້ເກີດສະພາບນ້ຳຖ້ວມ ຢູ່ 3 ເມືອງ ຄື: ເມືອງ ເມີງ, ປາກທາ ແລະ ເມືອງ ຜາອຸດົມ ຊຶ່ງໄດ້ຮັບຄວາມເສຍຫາຍ ດິນນາກ່ວາ 36 ເຮັກຕາ, ດິນເຈື່ອນທັງທາງ 80 ຈຸດ ລົດບໍ່ສາມາດໄປ-ມາໄດ້ ໝໍ້ແບ່ງໄຟຟ້າຖືກນ້ຳຖ້ວມ 50 ໜ່ວຍ ປະຊາຊົນບໍ່ສາມາດໄຊ້ໄຟໄດ້ແຕ່ວັນທີ 3 ສິງຫາ ແລະ ມີບາງແຫ່ງມີນ້ຳຖ້ວມເຖີງ 2-3 ແມັດ ເຮັດໃຫ້ປະຊາຊົນຕ້ອງໄດ້ຢູ່ໃຕ້ສະພາບນ້ຳຖ້ວມ ແລະ ຂາດອາຫານການກິນ ໂດຍສະເພາະນ້ຳດື່ມ, ອຳນາດການປົກຄອງແຂວງ ກໍຄືພາກສ່ວນກ່ຽວຂ້ອງໄດ້ປຸກລະດົມທຸກກຳລັງ ເພື່ອຊ່ວຍເຫຼືອໂດຍເລັ່ງດ່ວນ
    ນອກຈາກນີ້, ໜັງສືພິມປະຊາຊົນເສດຖະກິດ-ສັງຄົມ ໄດ້ລາຍງານສະພາບນ້ຳຖ້ວມຢູ່ແຂວງ ຄຳມ່ວນ ໃຫ້ຮູ້ວ່າ: ມີ 5 ເມືອງທີ່ຖືກນ້ຳຖ້ວມຄື: ເຊບັ້ງໄຟ, ໜອງບົກ, ຫີນບູນ, ມະຫາໄຊ ແລະ ເມືອງ ຄູນຄຳ ມີເນື້ອທີ່ການຜະລິດເສຍຫາຍ ກ່ວາ 5 ພັນເຮັກຕາ, ກວມເອົາ 130 ບ້ານ ແລະ 5 ພັນກ່ວາຄອບຄົວ ທີ່ຖືກຜົນກະທົບຈາກນ້ຳຖ້ວມ.
    ຂໍເຊີນຊວນທຸກທ່ານ ຮ່ວມໃຈກັນ ແບ່ງວັດຖຸປັດໄຈ ເພື່ອຊ່ວຍເຫຼືອຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມນໍາກັນ.


    www.tholakhong.com

ຂ່າວອື່ນ

ລາຍຊື່ລູກຄ້າຕອ້ງການຊື້ລົດ