ໃນວັນທີ 7 ສິງຫາຜ່ານມານີ້, ທີ່ກະຊວງພາຍໃນ, ທ່ານ ວິໄຊ ພັນດານຸວົງ ລັດຖະມົນຕີຊ່ວຍວ່າການກະຊວງດັ່ງກ່າວໄດ້ອອກມາຕອບຂໍ້ຂ້ອງໃຈກ່ຽວກັບການ ຢຸດຕິການສອບເສັງເຂົ້າລັດຖະກອນພາກຄວາມຮູ້ທົ່ວໄປຕໍ່ສື່ມວນຊົນວ່າ: 

ໂດຍປະຕິບັດຕາມແຈ້ງການເລກທີ 412/ຫລບ,ກສວ, ລົງວັນທີ 10 ມິນາ 2015 ຂອງຫ້ອງວ່າການລັດຖະບານ ກ່ຽວກັບການເພີ່ມຄວາມຮັບຜິດຊອບໃຫ້ອົງ ການຄຸ້ມຄອງລັດຖະກອນແຕ່ລະຂັ້ນ ໃຫ້ຫລາຍຂຶ້ນເພື່ອເຮັດໃຫ້ການສອບ ເສັງຄັດເລືອກ ແລະ ບັນຈຸລັດຖະກອນໃໝ່ບໍ່ຜ່ານຫລາຍຂັ້ນຕອນ, ຫລາຍຂອດ, ປະຫຍັດເວລາ ແລະ ງົບປະມານໃນການຈັດຕັ້ງປະຕິບັດຕົວຈິງ ແລະ ໃຫ້ກະຊວງພາຍໃນເພີ່ມບົດບາດຄຸ້ມຄອງມະຫາພາກ ກ່ຽວກັບ ການຄຸ້ມຄອງລັດຖະກອນເປັນຕົ້ນຕໍດ້ວຍການຊຸກຍູ້, ຕິດຕາມ ແລະ ກວດກາບັນດາກະຊວງ, ອົງການສູນກາງ ແລະ ທ້ອງຖິ່ນກ່ຽວກັບການຈັດຕັ້ງປະຕິບັດດໍາລັດເລກທີ 82/ນຍ, ລົງວັນທີ 19 ພຶດສະພາ 2003 ວ່າດ້ວຍລະບຽບລັດຖະກອນ ແຫ່ງ ສປປ ລາວ ແລະ ລະບຽບການຕ່າງໆກ່ຽວກັບການຄຸ້ມຄອງລັດຖະກອນໃຫ້ຫັນສູ່ຄຸນນະພາບຫລາຍຂຶ້ນ.

ລັດຖະມົນຕີຊ່ວຍກ່າວຕື່ມອີກວ່າ: ເຖິງແມ່ນກະຊວງພາຍໃນຈະຢຸດຕິການສອບເສັງເຂົ້າລັດຖະກອນພາກ ຄວາມ ຮູ້ທົ່ວໄປກໍຕາມນັບແຕ່ສົກປີ 2015-2016 ກະຊວງພາຍໃນໄດ້ສ້າງຕິນິກໍາ, ລະບຽບ, ເອກະສານຄູ່ມື, ມາດຕະການ ແລະວາງແຜນການລວມກ່ຽວກັບການບັນຈຸລັດຖະກອນໃໝ່, ພອ້ມທັງຈັດຕັ້ງເຜີຍແຜ່ຄວາມຮູ້ແລະຄວາມເຂົ້າໃຈເພື່ອເປັນບ່ອນອີງໃຫ້ແກ່ບັນດາກະຊວງ, ອົງການແລະທ້ອງຖິ່ນນໍາໄປຜັນຂະຫຍາຍ, ຈັດຕັ້ງປະຕິບັດຕົວຈິງໃນແຕ່ລະສົກງົບປະມານຢ່າງມີປະສິດທິພາບ, ຊຸກຍູ້, ຕິດຕາມ ແລະ ກວດກາການຈັດຕັ້ງປະຕິບັດສອບເສັງການບັນຈຸລັດຖະກອນຂອງບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນໃນແຕ່ລະສົກງົບປະມານໃຫ້ມີຄຸນນະພາບ, ປະສານສົມທົບແລະ ຊຸກຍູ້ບັນດາກະຊວງ, ອົງການຂັ້ນສູນກາງ ແລະ ທ້ອງຖິ່ນຄົ້ນຄວ້າປັບປຸງກົນໄກ ແລະ ລະບົບການສອບເສັງເພື່ອຫັນເປັນທັນສະໄໝ, ຮັບປະກັນໄດ້ຄວາມສະເໜີພາບໂປງໄສ ແລະ ມີຄວາມຍຸຕຕິທໍາ, ຕີຖອຍການສອບເສັງ, ການເລືອກເຟັ້ນເຂົ້າເປັນລັດຖະກອນແບບບໍ່ຖືກຕ້ອງ, ຮັກສາຄອງເດີມ ແລະ ຂາດຄຸນນະພາບ.

ພາບແລະຂ່າວ: ລາວພັດທະນາ

http://www.tholakhong.com