ສານສະແດງຄວາມເຫັນໃຈຕໍ່ເຫດລະເບີດແຕກຢູ່ໄທ (19-08-2015)


     

    ທ່ານ ທອງສິງ ທຳມະວົງ ນາຍົກລັດຖະມົນຕີ ແຫ່ງສາທາລະນະລັດ ປະຊາທິປະໄຕ ປະຊາຊົນລາວ ໄດ້ສົ່ງສານສະແດງຄວາມເຫັນໃຈເຖິງ ທ່ານ ພົນເອກ ປຣະຍຸດ ຈັນໂອຊາ ນາຍົກລັດຖະມົນຕີ ແຫ່ງ ຣາຊະອານາຈັກໄທ ທີ່ບາງກອກ ຕໍ່ເຫດການລະເບີດແຕກທີ່ສີ່ແຍກຣາຊະປະສົງ. 

    ເນື້ອໃນສານລະບຸວ່າ: ຂ້າພະເຈົ້າຮູ້ສຶກເສົ້າເສຍໃຈຢ່າງສຸດຊຶ້ງ ທີ່ໄດ້ຊາບຂ່າວກ່ຽວກັບ ເຫດການລະເບີດແຕກ ທີ່ສີ່ແຍກຣາ ຊະປະສົງ, ບາງກອກ ປະເທດໄທ ໃນຕອນຄ່ຳຂອງວັນທີ 17 ສິງຫາ 2015 ເຮັດໃຫ້ມີຜູ້ເສຍຊີວິດທັງປະຊາຊົນໄທ, ຊາວຕ່າງປະເທດ ແລະ ບາດເຈັບຈຳນວນຫລວງຫລາຍ, ອາຄານສະຖານທີ່ຕ່າງໆ ແລະ ຍານພາຫະນະທີ່ຢູ່ ບໍລິເວນໃກ້ຄຽງເກີດຄວາມເສຍຫາຍໜັກໜ່ວງ.


    ສາທາລະນະລັດ ປະຊາທິປະໄຕ ປະຊາຊົນລາວ ປະນາມການກະທຳທີ່ໄຮ້ມະນຸດສະທຳ ແລະ ໂຫດຮ້າຍປ່າເຖື່ອນດັ່ງກ່າວ, ເຊິ່ງມີຈຸດປະສົງທຳລາຍຊີວິດ ແລະ ຊັບສິນຂອງປະຊາຊົນຜູ້ບໍລິສຸດ ແລະ ເປັນເຫດການທີ່ສ້າງຄວາມເສຍຫາຍໃຫ້ແກ່ສັງຄົມ.

    ໃນນາມລັດຖະບານ, ປະຊາຊົນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ແລະ ໃນນາມສ່ວນຕົວ, ຂ້າພະເຈົ້າ ຂໍສະແດງຄວາມເຫັນອົກເຫັນໃຈຢ່າງສຸດຊຶ້ງ ແລະ ຂໍແບ່ງຄວາມທຸກໂສກມາ ຍັງລັດຖະບານ, ປະຊາຊົນ ແຫ່ງ ຮາຊະອານາຈັກໄທ ໂດຍສະເພາະຄອບຄົວຜູ້ເສຍຊີວິດ ໃນການສູນເສຍຄັ້ງນີ້ ແລະ ຫວັງຢ່າງຍິ່ງວ່າ ພາຍໃຕ້ການນຳພາຂອງທ່ານ, ລັດຖະບານ ແຫ່ງ ຣາຊະອານາຈັກໄທ ຈະເຮັດໃຫ້ສະຖານະການດັ່ງກ່າວ ກັບສູ່ສະພາບປົກກະຕິໂດຍໄວ ແລະ ຫາຜູ້ກະທຳຜິດມາລົງໂທດ ຕາມກົດໜາຍຕໍ່ໄປ.

    ຂ່າວສານປະເທດລາວ

    http://www.tholakhong.com

ຂ່າວອື່ນ